Azərbaycan Universitetində ümummilli lider Heydər Əliyevin xatirəsi yad edilib

Azərbaycan Universitetində ümummilli lider Heydər Əliyevin anadan olmasının 99-cu ildönümü münasibətilə anım tədbiri keçirilib. Tədbirdən əvvəl universitet kollektivi Fəxri Xiyabanı ziyarət edib, ümummilli liderin xatirəsi hörmət və ehtiramla yad olunub, məzarı önünə tər güllər qoyulub.

Görkəmli oftalmoloq-alim, akademik Zərifə xanım Əliyevanın da xatirəsi anılıb, məzarı üzərinə tər güllər düzülüb.

Universitetin tədris binasında keçirilən anım tədbirini giriş sözü ilə elmi işlər üzrə prorektor Yusif Qasımov açaraq qeyd edib ki, ümummilli lider Heydər Əliyev Azərbaycan xalqının yetişdirdiyi, millətinin yükünü çiyninə götürərək onu bir dövrdən başqa dövrə aparan ən böyük tarixi şəxsiyyətlərdən biridir. Həyat və fəaliyyətini Azərbaycan xalqına həsr edən Heydər Əliyev ölkəmizin inkişaf strategiyasını müəyyən edib və onun həyata keçirilməsi üçün mühüm addımlar atıb. Ümummilli liderin ömür yoluna nəzər salanda onun verdiyi qərarların, atdığı addımların real nəticələrini biz indi görür və aydın dərk edirik.

Anım tədbirində daha sonra İctimai elmlər kafedrasının müdiri, professor Qabil Əliyevin “Ulu öndər Heydər Əliyev strategiyasının II Qarabağ müharibəsində qələbədə rolu”, Sosial işin təşkili kafedrasının müdiri, pedaqogika üzrə fəlsəfə doktoru Tünzalə Verdiyevanın “Ulu öndər Heydər Əliyevin sosial sahəni inkişaf etdirmək tədbirləri haqqında”, Azərbaycan tarixi ixtisası üzrə magistratura II kurs tələbəsi Leyla Tağıyevanın “Ümummilli lider Heydər Əliyevin gənclərlə bağlı siyasəti” mövzusunda çıxışları dinlənilib.

Çıxışlarda qeyd olunub ki, ümummilli lider Heydər Əliyev ordu quruculuğu prosesini də diqqət mərkəzində saxlayıb. Sovet dövründə Heydər Əliyevin uzaqgörənliyi sayəsində Cəmşid Naxçıvanski adına hərbi məktəbin yaradılması ilə müstəqil Azərbaycanın Milli Ordusunun formalaşması üçün kadr probleminin həlli yolunda mühüm addım atılıb. Bildirilib ki, ölkə iqtisadiyyatının tənəzzüldən çıxması və daxili sabitliyin təmin edilməsinin ardından sosial sahədə də əhəmiyyətli addımlar atılıb. Heydər Əliyevin çoxşaxəli ictimai, siyasi, sosial-iqtisadi, mədəni və digər sahələrdəki yorulmaz fəaliyyəti ilə Azərbaycan xalqının taleyində və tarixində oynadığı rol illər ötdükcə daha dərindən dərk olunur.

Tədbir ümummilli lider Heydər Əliyevin həyat və fəaliyyətinə həsr olunan videoçarxın nümayişi ilə yekunlaşıb. Materialı Azərbaycan tarixi ixtisası üzrə magistratura II kurs tələbəsi Aliyə Hacıyeva hazırlayıb.

İctimaiyyətlə əlaqələr şöbəsi
10.05.2022