Azərbaycan Universitetinin Beynəlxalq əlaqələr şöbəsinin əməkdaşları Elmira İsmayılova və Sevlan Qurbanova “ESN Azerbaijan” (Erasmus Student Network Azerbaijan) “Training and Resources for Universities to Strengthen Transnational Partnerships” (TRUST) layihəsi çərçivəsində təşkil olunan təlimdə iştirak ediblər. Yerli ali təhsil müəssisələrinin beynəlxalq əlaqələr üzrə məsul struktur vahidlərinin əməkdaşları üçün keçirilən üçgünlük intensiv təlimlərin açılışında “ESN Azerbaijan” təşkilatının sədri Əli Tağıyev, Elm və Təhsil Nazirliyinin nümayəndəsi Günay Cəfərzadə və Erasmus+ Azərbaycan Milli Ofisinin direktoru Pərviz Bağırov çıxış edərək təlim mövzularının aktuallığı və əhəmiyyətindən danışıb, iştirakçılara uğurlar arzulayıblar. 

Təlimin ilk günündə Gürcüstanın Tbilisi Dövlət Universitetinin Beynəlxalq əlaqələr şöbəsinin müdiri Tea Gergedava ali təhsildə potensialın gücləndirilməsi layihələri haqqında məlumat verib. İkinci gün Türkiyənin Marmara Universitetinin Beynəlxalq əlaqələr şöbəsinin əməkdaşı Gülden Bulut mübadilə layihələrinin hazırlanmasından danışıb. Son gün isə Ukraynanın Mariupol Dövlət Universitetinin Beynəlxalq təhsil mərkəzinin direktoru İrina Sikorska Jean Monnet layihələrinin tərtib olunması haqqında iştirakçılarla müzakirələr aparıb, onların rəy və təkliflərini dinləyib. 

“Erasmus+ Tələbələr və Məzunlar Alyansı”nın (Erasmus+ Students and Alumni Alliance /ESAA) dəstəyi ilə təşkil olunan təlimlərin yekununda bütün iştirakçılara müvafiq sertifikatlar təqdim olunub.

 İctimaiyyətlə əlaqələr şöbəsi