Təhsildə sosial-psixoloji xidmət
- İxtisasın adı: Təhsildə sosial-psixoloji xidmət
- İxtisas qrupu: III
- Fakültə: Humanitar və sosial elmlər
- Təhsilin səviyyəsi: Bakalavriat
- Təhsilin müddəti və forması: 4 il (8 semestr), əyani
- Tədrisin dili: Azərbaycan dili
- Məzuna verilən ixtisas dərəcəsi: Bakalavr
- Təhsil haqqı: Azərbaycan bölməsi, əyani – 3000 AZN
Təhsildə sosial-psixoloji xidmət ixtisası təhsilalanların psixoloji və sosial inkişafını dəstəkləyən, onların təhsil mühitinə uyğunlaşmasına və qarşılaşdıqları sosial-psixoloji çətinliklərin aradan qaldırılmasına kömək edən mütəxəssislər hazırlayır. Mütəxəssis şagird və tələbələrin fərdi xüsusiyyətlərini, davranışlarını və sosial münasibətlərini müşahidə edir, onların ehtiyaclarını müəyyənləşdirir və uyğun dəstəyin göstərilməsində iştirak edir. Empatiya, diqqətlə dinləmə, ünsiyyət qurmaq, müşahidə aparmaq, məsuliyyətli olmaq və problemlərə həll yolları tapmaq bu sahədə üstünlük qazandıran xüsusiyyətlərdir.
Təhsil
Bu ixtisas üzrə təhsil alan tələbələrə eksperimental psixologiya, inkişaf və yaş psixologiyası, sosial psixologiya, pedaqogika, psixologiyanın tədrisi metodikası, ailə və gender psixologiyası, şəxsiyyətlərarası münasibətlərin sosial-psixoloji problemləri və digər əlaqəli fənlər tədris olunur.
Tədris prosesində tələbələr müxtəlif yaş qruplarının psixoloji və sosial inkişaf xüsusiyyətləri, təhsil mühitində şəxsiyyətlərarası münasibətlər, emosional və davranış çətinlikləri, sosial-psixoloji problemlərin qiymətləndirilməsi və profilaktikası haqqında nəzəri biliklər və praktik bacarıqlar əldə edirlər. Bu hazırlıq gələcək mütəxəssislərə təhsilalanların fərdi ehtiyaclarını müəyyənləşdirməyə, müvafiq psixoloji və sosial dəstək üsullarını seçməyə, eləcə də təhlükəsiz, dəstəkləyici və inklüziv təhsil mühitinin formalaşdırılmasına töhfə verməyə imkan yaradır.
Karyera imkanları
Məzunlar məktəblərdə, kolleclərdə və universitetlərdə, psixoloji xidmət və məsləhət mərkəzlərində, dövlət qurumlarında, sosial xidmət müəssisələrində və təhsilalanlarla işləyən digər təşkilatlarda fəaliyyət göstərə bilərlər. Onların əsas fəaliyyət istiqamətləri arasında təhsilalanların sosial və psixoloji vəziyyətinin müşahidəsi, uyğunlaşma prosesinə dəstək, konfliktlərin həllinə yardım, valideyn və müəllimlərlə əməkdaşlıq, eləcə də sosial-psixoloji problemlərin qarşısının alınmasına yönəlmiş fəaliyyətlər yer alır.
İxtisasın gələcəyi
Müasir təhsil sistemində şagird və tələbələrin psixoloji rifahının qorunmasına, sosial adaptasiyasına və təhlükəsiz, inklüziv təhsil mühitinin formalaşdırılmasına verilən əhəmiyyətin artması Təhsildə sosial-psixoloji xidmət ixtisasının aktuallığını daha da gücləndirir. İnklüziv təhsilin genişlənməsi, təhsilalanların fərdi ehtiyaclarının nəzərə alınması, emosional və davranış çətinliklərinin erkən müəyyənləşdirilməsi, eləcə də təhsil müəssisələrində psixoloji dəstək və profilaktik xidmətlərin inkişafı bu sahədə ixtisaslı mütəxəssislərə ehtiyacı artıran əsas amillərdəndir.
Təhsilalanların sosial-emosional bacarıqlarının inkişaf etdirilməsi, psixoloji rifahının dəstəklənməsi və təhsil mühitində sağlam şəxsiyyətlərarası münasibətlərin təşviqi bu ixtisasın gələcək inkişaf istiqamətləri arasında mühüm yer tutur.
- Təhsildə sosial-psixoloji xidmət ixtisasının Təhsil Proqramını BURADAN yükləyə bilərsiniz.
- Təhsildə sosial-psixoloji xidmət ixtisasının Tədris Planını BURADAN görə bilərsiniz.